פרק א
אִיתָא בְּמִדְרָשׁ תִּילִים, "ר' אֱלִיעֶזֶר אוֹמֵר, אַָמְרוּ יִשְׂרָאֵל לִפְנֵי הַקָבָּ"ה: רִבּוֹנוֹ שֶׁל עוֹלָם, רוֹצִין אָנוּ לִיגַע בַּתּוֹרָה יוֹמָם וָלַיְלָה, אֲבָל אֵין לָנוּ פְּנַאי". אִידְן זָאגְן צוּם אוֹיבֶּערְשְׁטְן: רִבּוֹנוֹ שֶׁל עוֹלָם, מִיר וִוילְן הָארֶעוֶוען אִין תּוֹרָה בַּיְיטָאג אוּן בַּיְינַאכְט, אָבֶּער מִיר הָאבְּן נִישְׁט קֵיין צַייט. "אָמַר לָהֶם הַקָבָּ"ה, קַיְּמוּ מִצְוַת תְּפִילִּין וּמַעֲלֶה אֲנִי עֲלֵיכֶם כְּאִילּוּ אַתֶּם יְגֵיעִים בַּתּוֹרָה יוֹמָם וָלַיְלָה". זָאגְט דֶער אוֹיבֶּערְשְׁטֶער צוּ אִידְן: זַיְיט מְקַיֵּים מִצְוַת תְּפִילִּין, וֶועל אִיךְ אַיְיךְ פַארְרֶעכֶענֶען וִוי אִיר וָואלְט הָארֶעוֶוען אִין תּוֹרָה בַּיְיטָאג אוּן בַּיְינַאכְט.
אִיז לִכְאוֹרָה נִישְׁט פַארְשְׁטַאנְדִיק, וָואס אִיז דֶער עִנְיָן פוּן מִצְוַת תְּפִילִּין וָואס פַארְטְרֶעט לִימּוּד הַתּוֹרָה, אוּן וָואס אִיז דִי שַׁיְיכוּת פוּן דִי צְוֵויי עִנְיָנִים, תְּפִילִּין אוּן לִימּוּד הַתּוֹרָה, אֵיינֶער צוּם צְוֵוייטְן.
נָאר דֶער עִנְיָן אִיז, עֶס שׁטֵייט דָאךְ מַגִּיד דְּבָרָיו לְיַעֲקֹב חוּקָּיו וּמִשְׁפָּטָיו לְיִשְׂרָאֵל. זָאגְט דֶער מִדְרָשׁ אוֹיף דֶעם "יֵשׁ מִי שֶׁהוּא מְצַוֶּה לַאֲחֵרִים לַעֲשׂוֹת וְהוּא אֵינוֹ עוֹשֶׂה אֲבָל הַקָבָּ"ה מַה שֶׁהוּא עוֹשֶׂה אוֹמֵר לְיִשְׂרָאֵל לַעֲשׂוֹת, שֶׁנֶּאֱמַר מַגִּיד דְּבָרָיו לְיַעֲקֹב חוּקָּיו וּמִשְׁפָּטָיו". עֶס אִיז פַארַאן אֵיינֶער וָואס הֵייסְט אַנְדֶערֶע טָאן אָבֶּער עֶר אַלֵיין טוּט נִישְׁט, אָבֶּער דֶער אוֹיבֶּערְשְׁטֶער וָואס עֶר אַלֵיין טוּט הֵייסְט עֶר אִידְן טָאן, וִוי עֶס שְׁטֵייט מַגִּיד דְּבָרָיו לְיַעֲקֹב חוּקָּיו וּמִשְׁפָּטָיו, אַז זַיְינֶע דְבָרִים חוּקִּים וּמִשְׁפָּטִים וָואס עֶר אַלֵיין טוּט, זָאגְט עֶר אִידְן צוּ טָאן.
אוּן דֶער פְּשַׁט פוּן "מַה שֶּׁהוּא עוֹשֶׂה" אִיז, וֶוער אִיז גוֹרֵם אַז דֶער אוֹיבֶּערְשְׁטֶער זָאל טָאן דִי מִצְווֹת, דוּרְכְדֶעם וָואס אִידְן טוּעֶן דִי מִצְווֹת זַיְינֶען זֵיי גוֹרֵם אַז דֶער אוֹיבֶּערְשְׁטֶער זָאל טָאן אָט אָ דִי מִצְווֹת, קוּמְט דָאךְ אוֹיס אַז דוּרְכְדֶעם וָואס אִידְן לֵייגְן תְּפִילִּין זַיְינֶען זֵיי גוֹרֵם אַז הַקָבָּ"ה זָאל זַיְין מֵנִיחַ תְּפִילִּין.
וְהִנֵּה אָמְרוּ רַזַ"ל: תְּפִילִּין דְמָארֵי עָלְמָא מַה כְּתִיב בְּהוּ? וּמִי כְּעַמְּךָ יִשְׂרָאֵל גּוֹי אֶחָד בָּאָרֶץ. אַז אִין דֶעם אוֹיבֶּערְשְׁטְנְס תְּפִילִּין שְׁטֵייט דִי מַעֲלָה פוּן אִידְן אַז זֵיי זַיְינֶען אַ גוֹי אֶחָד בָּאָרֶץ. קוּמְט דָאךְ אוֹיס אַז דוּרְכְדֶעם וָואס הַקָּבָּ"ה מֵנִיח תְּפִילִּין וֶוערְן אִידְן גְרֶעסֶער.
קְלֶערֶער פַארְשְׁטֵיין דֶעם עִנְיָן, עֶס שְׁטֵייט דָאךְ "הַשְׁקִיפָה מִמְּעוֹן קָדְשְׁךָ מִן הַשָּׁמַיִם וּבָרֵךְ אֶת עַמְּךָ יִשְׂרָאֵל", וַויְיל עֶס שְׁטֵייט דָאךְ "רָם עַל כָּל גּוֹיִם הוי'" אַז הוּא יִתְבָּרֵךְ אִיז מְרוֹמָם, דֶערְהוֹיבְּן פוּן וֶועלְט, אוּן מִצַּד עַצְמוּתוֹ אִיז "אִם חָטָאתָ מַה תִּפְעוֹל בּוֹ, וְרַבּוּ פְשָׁעֶיךָ מַה תַּעֲשֶׂה לּוֹ, אִם צָדַקְתָּ מַה תִּתֶּן לוֹ וּמַה מִיָּדְךָ יִקָּח", אוּן אַלֶע עוֹלָמוֹת עֶלְיוֹנִים וְתַחְתּוֹנִים זַיְינֶען כּוּלָּא קַמֵּיהּ כְּלָא מַמָּשׁ חֲשִׁיבֵי, אוּן וִוי עֶס שְׁטֵייט "כִּי נִשְׂגָּב שְׁמוֹ לְבַדּוֹ", אַז שְׁמוֹ אִיז לְבַדּוֹ, הֶעכֶער פוּן וֶועלְט, נָאר בְּלוֹיז "הוֹדוֹ" זִיווֹ אוּן אַ הֶאָרָה פוּן שְׁמוֹ אִיז עַל אֶרֶץ וְשָׁמָיִם.
אוּן דָאס אִיז וָואס עֶס שְׁטֵייט "כַּד סָלִיק הַקָּבָּ"ה לְעֵילָּא", דָאס מֵיינְט וֶוען דֶער חַיּוּת פוּן דֶער הֶאָרָה וֶוערְט נִסְתַּלֵּק לְמַעְלָה מַעְלָה צוּ דֶער בְּחִינָה פוּן עַצְמוּת, אוּן דֶעמָאלְט זַיְינֶען דִי עוֹלָמוֹת נִישְׁט תּוֹפֵס מָקוֹם, אוּן דִי הַנְהָגָה פוּן דִי עוֹלָמוֹת אִיז בִּבְחִינַת שֵׁינָה כִּבְיָכוֹל, אַזוֹי וִוי אַ מֶענְטְשׁ וָואס שְׁלָאפְט, וָואס דֶער שֵׂכֶל וֶוערְט נִסְתַּלֵק פוּן דֶער כְּלִי — וָואס דָאס אִיז דֶער גּוּף — צוּ זַיְין מָקוֹר וְשׁוֹרֶשׁ, אוּן עֶס בְּלַיְיבְּט אִיבֶּער בְּלוֹיז דֶער כֹּחַ הַדִּמְיוֹן (דֶער פָארְשְׁטֶעלוּנְגְס-קְרַאפְט) וָואס דָאס אִיז בְּלוֹיז אַ רוֹשֶׁם.
וָואס דֶערְפַאר שְׁטֵייט "וַיִּקַץ כְּיָשֵׁן הוי'" אוּן עֶס שְׁטֵייט "עוּרָה לָמָּה תִישַׁן הוי'", אַז עֶס זָאל זַיְין דֶער גִּילּוּי "אוֹר אֵין סוֹף בָּרוּךְ הוּא" אִין חָכְמָה אוּן חֶסֶד, אִין דִי בְּחִינָה פוּן עַצְמוּתוֹ וּמַהוּתוֹ יִתְבָּרֵךְ בִּכְבוֹדוֹ וּבְעַצְמוֹ, אוּן עֶס זָאל זַיְין "יָאֵר פָּנָיו" עֶס זָאל מֵאִיר זַיְין פְּנִימִיּוּת רְצוֹנוֹ, אוּן דָאס אִיז — דוּרְךְ דִי הַמְשָׁכָה פוּן תּוֹרָה אוּן מִצְווֹת.
וָואס דָאס אִיז וָואס סְ'שְׁטֵייט "הַבֵּט מִשָּׁמַיִם וּרְאֵה" אוּן "הַשְׁקִיפָה מִמְּעוֹן קָדְשְׁךָ מִן הַשָּׁמַיִם", וָואס שָׁמַיִם אִיז שָׁם מַיִם, וָואס דָאס אִיז בְּחִינַת הַתּוֹרָה וֶועלְכֶע אִיז גֶעגְלִיכְן צוּ מַיִם [וִוי עֶס שְׁטֵייט "הוֹי כָּל צָמֵא לְכוּ לַמַּיִם", וָואס דָאס גֵייט אוֹיף בְּחִינַת הַתּוֹרָה], אִיז דֶעמָאלְט וֶועט זַיין "וּבָרֵךְ אֶת עַמְּךָ יִשְׂרָאֵל", וַויְיל דוּרְךְ אָט דִי בְּחִינָה וֶועלְן מִיר, עַם בְּנֵי יִשְׂרָאֵל, גֶעזֶען וֶוערְן פַאר דֶעם אוֹיבֶּערְשְׁטְן פַאר אַ דָּבָר חָשׁוּב, וַויְיל דֶער עִיקַּר הַשָּׂגָה אוּן גִּילּוּי אִיז דוּרְךְ תּוֹרָה, אוּן תּוֹרָה אִיז בַּיְי אוּנְז בְּהִתְגַּלּוּת.
וָואס דָאס אִיז וָואס דֶער פָּסוּק זָאגְט "נִפְתְּחוּ הַשָּׁמַיִם וָאֶרְאֶה מַרְאוֹת אֱלֹקִים", וָואס דָאס אִיז דִי בְּחִינָה פוּן אַסְפַּקְלַרְיָא הַמְּאִירָה, אַז דוּרְךְ דִי בְּחִינָה פוּן שָׁמַיִם (וָואס דָאס אִיז דִי בְּחִינָה פוּן תּוֹרָה) זֶעט זִיך פַאר דֶעם אוֹיבֶּערְשְׁטְן כִּבְיָכוֹל וִוי אֵיינֶער וָואס קוּקְט דוּרְךְ אַ (לַיְיכְטְנְדִיקְן) פַארְגְרֶעסֶער-גְלָאז, וָואס דֶעמָאלְט זֶעט זִיך דִי זַאךְ אַ גְרֶעסֶערֶע אוּן בֶּעסֶערֶע וִוי אָן דֶער גְלָאז. אַזוֹי אוֹיךְ דוּרְךְ דִי הַבָּטָה וְהַשְׁקָפָה בִּבְחִינַת הַתּוֹרָה זֶעעֶן זִיךְ אִידְן (וָואס זַיְינֶען מְקַיֵּים תּוֹרָה) פַאר דֶעם אוֹיבֶּערְשְׁטְן, בִּבְחִינַת שֶׁבַח וּגְדוּלָּה.
אוּן דָאס אִיז "וּמִי כְּעַמְּךָ יִשְׂרָאֵל גּוֹי אֶחָד בָּאָרֶץ", אַז זֵיי זַיְינֶען מַמְשִׁיךְ דִי בְּחִינָה פוּן אֶחָד אִין אֶרֶץ, אַז עֶס זָאל שׁוֹרֶה זַיְין אוּן מִתְגַּלֶּה וֶוערְן בְּחִינַת הוי' אֶחָד אִין אֶרֶץ הַתַּחְתּוֹנָה.
פרק ב
וּבִיאוּר עִנְיַן מַעֲלַת הַתּוֹרָה, וֶועט מֶען דָאס פַארְשְׁטֵיין פוּן מַאֲמַר רַזַ"ל "אַלְפַּיִם שָׁנָה קָדְמָה תּוֹרָה לְעוֹלָם", וָואס דֶער פְּשַׁט פוּן קָדְמָה מֵיינְט נִישְׁט קְדִימָה אִין זְמַן, וַויְיל זְמַן אוּן מָקוֹם זַיְינֶען דָאךְ בֵּיידֶע מְחוּדָּשִׁים, אוּן פַאר בְּרִיאַת הָעוֹלָם אִיז דָאךְ בְּחִינַת הַזְּמַן אוֹיךְ נִישְׁט גֶעוֶוען. נָאר קְדִימָה מֵיינְט קְדִימָה אִין מַעֲלָה, אַז תּוֹרָה אִיז הֶעכֶער פוּן וֶועלְט.
וַויְיל דֶער שׁוֹרֶש וּמָקוֹר פוּן עוֹלָמוֹת אִיז פוּן בְּחִינַת מִדּוֹת, וִוי עֶס שְׁטֵייט "שֵׁשֶׁת יָמִים עָשָׂה" אוּן עֶס שְׁטֵייט נִישְׁט בְּשֵׁשֶׁת, נָאר דִי שֵׁשֶׁת יָמִים זַיְינֶען דָאס דִי שִׁשָּׁה מִדּוֹת עֶלְיוֹנוֹת, אוּן שֵׁשֶׁת יָמִים עָשָׂה מֵיינְט אַז דִי שִׁשָּׁה מִדּוֹת עֶלְיוֹנוֹת זַיְינֶען נִשְׁפַּל גֶעוָוארְן אִין דִי בְּחִינָה פוּן עֲשִׂיָּה.
וָואס דָאס אִיז וָואס דֶער אָנְפַאנְג פוּן דִי עֲשָׂרָה מַאֲמָרוֹת אִיז בְּרֵאשִׁית, וָואס דָאס אִיז בָּרָא-שִׁית, וָואס דֶער פְּשַׁט פוּן בָּרָא שִׁית אִיז, עַל דֶּרֶךְ וִוי עֶס שְׁטֵייט "עוֹלָם חֶסֶד יִבָּנֶה", וָואס אִין דֶעם זַיְינֶען דָא צְוֵויי פֵּירוּשִׁים, אֵיין פֵּירוּשׁ אִיז אַז בִּכְדֵי עֶס זָאלְן נִתְהַוֶּוה וֶוערְן עוֹלָמוֹת, אִיז דָאס דוּרְךְ מִדַּת הַחֶסֶד, וָואס אָט-דִי מִדָּה אִיז אָזִיל עִם כּוּלְהוּ יוֹמִין. אוּן דֶער צְוֵוייטֶער פֵּירוּשׁ אִיז, אַז מְ'דַארְף בּוֹיעֶן דִי מִדַּת הַחֶסֶד. אוּן עַל דֶּרֶךְ זֶה אִיז בְּרֵאשִׁית בָּרָא-שִׁית, וָואס דָאס אִיז בִּנְיַן הַמִּדּוֹת כְּדֵי עֶס זָאל זַיין אַ מָקוֹר אוֹיף עוֹלָמוֹת בִּי"עַ.
אָבֶּער דִי תּוֹרָה אִיז קָדְמָה לָעוֹלָם, וַויְיל אוֹרַיְיתָא מֵחָכְמָה נָפְקַת, תּוֹרָה נֶעמְט זִיךְ פוּן חָכְמָה, אוּן בְּחִינַת מוֹחִין זַיְינֶען אִינְגַאנְצְן נִישְׁט שַׁיָּיכוֹת צוּ דִי עוֹלָמוֹת, אוּן אוֹיך וֶוען סְ'אִיז נִיטָא צוּ וֶועמֶען צוּ מַשְׁפִּיעַ זַיין אַ דְבַר שֵׂכֶל קֶען עֶר זִיצְן פַאר זִיך אוּן טְרַאכְטְן הַשְׂכָּלוֹת. אַנְדֶערְשׁ אִיז אָבֶּער בְּחִינַת הַמִּדּוֹת. עַל דֶּרֶךְ מָשָׁל מִדַּת הַחֶסֶד, אַז וֶוען עֶס אִיז נִיטָא צוּ וֶועמֶען מַשְׁפִּיעַ זַיְין טוֹב וְחֶסֶד, וֶוערְט דָאךְ דִי גַאנְצֶע מִדָּה בָּטֵל אוּן אַזוֹי וִוי זִי וָואלְט אִינְגַאנְצְן נִישְׁט גֶעוֶוען, אַזוֹי וִוי מִיר גֶעפִינֶען בַּיי אַבְרָהָם אָבִינוּ, "וְהוּא יוֹשֵׁב פֶּתַח הָאוֹהֶל כְּחוֹם הַיּוֹם", וָואס דָאס וָואס עֶר אִיז גֶעזֶעסְן פֶּתַח הָאוֹהֶל, אִיז גֶעוֶוען וַויְיל עֶר הָאט גֶעזוּכְט עוֹבְרִים וְשָׁבִים בִּכְדֵי עֶר זָאל הָאבְּן צוּ וֶועמֶען מַשְׁפִּיעַ זַיְין חֶסֶד, וַויְיל אָן אַ מְקַבֵּל פַארְלִירְט זִיך אִינְגַאנְצְן דִי פְּעוּלָּה פוּן מַשְׁפִּיעַ.
אוּן עַל דֶּרֶךְ זֶה וֶועט מֶען פַארְשְׁטֵיין לְמַעְלָה, וָואס עֶס שְׁטֵייט "זְכוֹר רַחֲמֶיךָ וַחֲסָדֶיךָ כִּי מֵעוֹלָם הֵמָּה", אַז דִי בְּחִינָה פוּן רַחֲמִים וַחֲסָדִים הָאבְּן אַ שַׁיְיכוּת צוּ עוֹלָמוֹת, אוּן וִוי אוֹיבְּן-גֶערֶעדְט אִין דֶעם עִנְיָן פוּן "כִּי אָמַרְתִּי עוֹלָם חֶסֶד יִבָּנֶה", אוּן וִוי מֶען הָעט גֶעטַיְיטְשְׁט אַז מְ'דַארְף בּוֹיעֶן מִדַּת הַחֶסֶד, וַויְיל אָן הִתְהַוּוּת הָעוֹלָמוֹת דַארְף מֶען דָאךְ נִיט מִדַּת הַחֶסֶד, וַויְיל מִיט וֶועמֶען וֶועט עֶר טָאן חֶסֶד.
אוּן דָאס אִיז וָואס דֶער עֵץ חַיִּים הוֹיבְּט אָן "כְּשֶׁעָלָה בִּרְצוֹנוֹ הַפָּשׁוּט לְהֵיטִיב לִבְרוּאָיו" וָואס דָאס אִיז מִצַּד טֶבַע הַטּוֹב לְהֵיטִיב, בְּחִינַת הַשְׁפָּעַת הַחֶסֶד, וָואס וֶוערְט נִמְשָׁךְ פוּן בְּחִינַת כִּי חָפֵץ חֶסֶד, וָואס הַשְׁפָּעַת הַחֶסֶד אִיז דֶער חֶסֶד שֶׁבְּחֵפֶץ הוי'.
אָבֶּער פוּן בְּחִינַת מוֹחִין אִיז נִישְׁט נִמְשַׁךְ גֶעוָוארְן אִין בְּרִיאַת הָעוֹלָם. אוּן כָאטְשׁ דִי רַזַ"ל זָאגְן "בַּעֲשָׂרָה דְבָרִים בָּרָא הַקָבָּ"ה עוֹלָמוֹ, בְּחָכְמָה וּבִתְבוּנָה וּבְדַעַת", אוּן אִין סֵפֶר יְצִירָה שְׁטֵייט "בִּשְׁלשָׁה סְפָרִים כוּ' בְּסֵפֶר וְסוֹפֵר וְסִיפּוּר", אוּן וִוי עֶס רֶעדְט זִיךְ אִין מַאֲמָר וּשְׁאַבְתֶּם, אַז סוֹפֵר מִיט אַ ו' אִיז חָכְמָה אוּן סֵפֶר אָן אַ ו' אִיז בִּינָה, אַזוֹי וִוי דֶער סוֹפֵר וָואס שְׁרַיְיבְּט אַ סֵפֶר, פוּנְדֶעסְטְוֶועגְן, דָאס וָואס וֶוערְט נִמְשָׁךְ אִין מִדּוֹת אִיז דָאס נָאר בְּחִינַת מוֹחִין שֶׁבְּמִדּוֹת אָבֶּער נִישְׁט מוֹחִין בְּעֶצֶם. אָבֶּער אוֹרַיְיתָא מֵחָכְמָה נָפְקַת אִיז דָאס פוּן מוֹחִין בְּעֶצֶם. דֶערְפַאר אִיז אַלְפַּיִם שָׁנָה קָדְמָה תּוֹרָה לָעוֹלָם [וָואס דָאס אִיז אֲאַלֶּפְךָ חָכְמָה אֲאַלֶּפְךָ בִּינָה, וָואס דָאס זַיְינֶען דִי בְּחִינָה פוּן מוֹחִין, זַיְינֶען זֵיי הֶעכֶער פוּן עוֹלָם וָואס אִיז מִדּוֹת, אוּן דָאס אִיז אַלְפַּיִם, פוּן לָשׁוֹן אֲאַלֶּפְךָ].
פרק ג
וְזֶהוּ שֶׁאָמַר ר' אֱלִיעֶזֶר "אָמְרוּ יִשְׂרָאֵל לִפְנֵי הַקָבָּ"ה רוֹצִין אָנוּ לִיגַע בַּתּוֹרָה", וַויְיל דוּרְךְ לִימּוּד תּוֹרָה וֶועלְן זֵיי מַמְשִׁיךְ זַיְין בְּחִינַת מוֹחִין אִין מִדּוֹת, וָואס דָאס אִיז אַ מַעֲלָה גְדוֹלָה וְנִפְלָאָה, "אֲבָל אֵין לָנוּ פְּנַאי", מִיר הָאבְּן נִישְׁט קֵיין צַיְיט. זָאגְט צוּ זֵיי דֶער אוֹיבֶּערְשְׁטֶער "קַיְּמוּ מִצְוַת תְּפִילִּין וּמַעֲלֶה אֲנִי עֲלֵיכֶם כְּאִלּוּ אַתֶּם יְגֵיעִים בַּתּוֹרָה יוֹמָם וָלַיְלָה", וַויְיל דוּרְךְ מִצְוַת תְּפִילִּין אִיז מֶען מַמְשִׁיךְ אַז עֶס זָאל זַיְין הַקָבָּ"ה מֵנִיחַ תְּפִילִּין.
וָואס דֶער פֵּירוּשׁ פוּן הַקָבָּ"ה אִיז זוּ"ן דַּאֲצִילוּת (זָ"א אוּן מַלְכוּת דַּאֲצִילוּת), וָואס זָ"א אִיז קָדוֹשׁ אוּן מַלְכוּת אִיז בָּרוּךְ, וִוי סְ'אִיז בַּאוואוּסְט וֶועגְן דֶעם עִנְיָן פוּן יוֹם אוּן לַיְלָה, אַז קָדוֹשׁ אִיז יוֹם אוּן בָּרוּךְ אִיז לַיְלָה, וָואס דֶערְפַאר בְּשַׁעַת דִי מַלְאָכִים הָאבְּן גֶעזָאגְט קָדוֹשׁ הָאט מֹשֶׁה רַבֵּינוּ עָלָיו הַשָּׁלוֹם אוֹיפְן בַּארְג גֶעוואוּסְט אַז סְ'אִיז טָאג, אוּן וֶוען זֵיי הָאבְּן גֶעזָאגְט בָּרוּךְ הָאט עֶר גֶעוואוּסְט אַז סְ'אִיז נַאכְט.
אָבֶּער דֶער עִנְיָן פוּן הַקָבָּ"ה מֵנִיחַ תְּפִילִּין אִיז, דִי הַמְשָׁכָה פוּן מוֹחִין אִין מִדּוֹת, וָואס דָאס מֵיינְט בְּחִינַת מוֹחִין בְּעֶצֶם, אוּן דֶערִיבֶּער אִיז אַ קָטָן וָואס אִיז נָאך נִישְׁט גֶעוָוארְן דְרַיְיצְן יָאר, אִיז עֶר פָּטוּר פוּן תְּפִילִּין, וַויְיל עֶר וֶוערְט נִישְׁט אָנְגֶערוּפְן "אִישׁ" אוּן הָאט בְּלוֹיז קַטְנוּת הַמּוֹחִין, נָאר וֶוען עֶר וֶוערְט אַ בֶּן י"ג שָׁנָה וְיוֹם אֶחָד, וָואס דֶעמָאלְט וֶוערְט עֶר אַ אִישׁ, אִיז דֶעמָאלְט דוּרְךְ הֲנָחַת תְּפִילִּין אִיז עֶר מַמְשִׁיךְ אַז עֶס זָאל זַיְין הַקָבָּ"ה מֵנִיחַ תְּפִילִּין.
אִיז פוּן דֶעם פַארְשְׁטַאנְדִיק, אַז דֶער עִנְיָן פוּן תְּפִילִּין שֶׁלְּמַעְלָה אִיז הַמְשָׁכַת מוֹחִין בְּעֶצֶם, קוּמְט דָאךְ אוֹיס אַז דָאס אִיז אֵיין בְּחִינָה מִיט דֶעם עִנְיָן פוּן לִימּוּד הַתּוֹרָה. אוּן דֶערְפַאר זָאגְט עֶר "קַיְּמוּ מִצְוַת תְּפִילִּין וּמַעֲלֶה אֲנִי עֲלֵיכֶם כְּאִילּוּ אַתֶּם יְגֵיעִים בַּתּוֹרָה יוֹמָם וָלַיְלָה", וַויְיל דוּרְךְ תְּפִילִּין טוּט מֶען אוֹיף דֶעם זֶעלְבְּן עִנְיָן וִוי דוּרְךְ לִימּוּד הַתּוֹרָה.
אוּן דָאס וָואס עֶר זָאגְט "כְּאִילּוּ" (וָואס דָאס וַויְיזְט אוֹיס אַז עֶס אִיז נִישְׁט מַמָּשׁ דִי זֶעלְבֶּע זַאךְ). אִיז עֶס וַויְיל דוּרְךְ יְגִיעָה אִין תּוֹרָה וָואלְט עֶס נִמְשָׁךְ וֶוערְן אִין אֲוִיר הָעוֹלָם, דֶערְפַאר זָאגְט עֶר אַז הֲגַם דוּרְךְ תְּפִילִּין וֶוערְט הַמְשָׁכַת הַמּוֹחִין אִין שׁוֹרֶשׁ וּמָקוֹר הַמְהַוֶּוה עוֹלָמוֹת, פוּנְדֶעסְטְוֶועגְן "מַעֲלֶה אֲנִי עֲלֵיכֶם כְּאִילּוּ אַתֶּם יְגֵיעִים בַּתּוֹרָה יוֹמָם וָלַיְלָה" אִין בְּחִינַת עוֹלָם שֶׁלְּמַטָּה.
